Mar 9 | MHL | STEP | Ne nainiw wia maakek, “Yo maken akena maiyem, Mua Maneka ona kekanowa onaiya miiw mua ona pika kemena-pa wia fiirimiya nain ni aakisa fan ikeman fain mua papako me umowa ikok maa nain imenareya wiar urufowen.” Naap wia maakek.

Mark 9

1 Ne nainiw wia maakek, “Yo maken akena maiyem, Mua Maneka ona kekanowa onaiya miiw mua ona pika kemena-pa wia fiirimiya nain ni aakisa fan ikeman fain mua papako me umowa ikok maa nain imenareya wiar urufowen.” Naap wia maakek.

Yeesus ema-pa ikok mia sira onaiya imenarek

(Matiu 17.1-13, Luk 9.28-36)

2 Aria fofa ikur okaiwi-pa kuisow naap ikiweya Yeesus-ke Pita, Yems ne Yon naap wia aawep ema maneka wia amapikiwep wiisow muuta nan ikemik. Naap ikok urufam-ikaiwkin mia sira onaiya imenarek, 3 ne ona mia suuwowa pun mokom pauwura saarik wilinem-ikua, kia akena. Kia nain mokoka nefa mikinon.

4 Aria mua wiam erup, Elaiya Moses ikos imenarep o wameiya aakunem-ikemik. 5 Ne naap wia urufap Pita-ke manek akena kema tootonep maa me kema suuwowa maek, “Ei, somek mua, eliw akena i fan urupemik. I feek ikok marari koora arow nia kuomiyen, oko nena, oko Moses ne oko Elaiya.” 7 Naap maem-ikaeya maa ipisia-ke oromi wia wakesimok. Ne aakunowa-ko maa ipisia tepak-pa feenap maek, “Mua fain yena Muuka akena-ke. Ni opora wiar miimeka.” Naeya Pita ame kiremik-na wi nainiw me wia urufamik. Yeesus waisow nan ikua.

9 Aria wi ema-pa orom-ikok Yeesus opor kekanowa wia maakek, “Ni maa urufaman nain mua papako me wia maakeka. Ikoka yo Mua Muuka umep ikok iikiramkun wia maakowen.” 10 Wia maakek nain kemaiw naap ikemik. Wi wieniw nain aakunemi maemik, “Umep ikok iikirowa maek nain maa mauwa maek?”

11 Naemi o nokaremik, “Moram wi sira amis mua-ke maemik, ‘Elaiya kiikiriw ekapinon’?” 12 Ne wia maakek, “Makena, Elaiya kiikir ekapep maa unowa kakenap-puinon. Moram Mua Maneka opora feenap maek, ikoka miiw mua-ke Mua Muuka sirirowa iwemi mikikira iwikuan. Eena opora fain ikoka makena imenarinon nain. 13 Yo makena nia maakiyem. Elaiya iiriw ekapok ne wi mua-ke wiena kookalowa-pa o sira samo-samora onamik, Mua Maneka opora maek naap.”

Yeesus takira sawur-ke anirawap ikemik nain saliwak

(Matiu 17.14-21, Luk 9.37-43)

14 Aria wi ema-pa oromi wiena teeria papako wiar ekapemik-na ona teeria papako wi sira amis mua-ke oporiw wiamiya irakem-ikemik. Ne yakeyak maneka wia warikap wia urufam-ikemik. 15 Yeesus wiar ekapem-ikaeya wi unowiya o urufap soranep karuwiw ookap ikip ane-puukamik. 16 Ne Yeesus-ke ona teeria wia nokarek, “Ni maa mauwa oporiw wiamiya irakem-ikaiman?”

17 Ne mua oko-ke ekap maakek, “Oo somek mua. Yo muuka no amapekapomem, sawur-ke anirawiwkin me aakuniya. 18 Sawur-ke anirawap miiwa-pa ipiskeya wakiya. Ne opek fafela maala maala oromi enek muuna geegenem-miawiya. Ne wapena merena tiinurumep ikaiya. Ne nena teeria sawur nain iirareka wia naakem-na wi me pepek.”

19 Ne Yeesus-ke wia maakek, “Ni aakis teeria fain yo opora baliwep me efar opiman. Yo anane maneka naap niamiya ikainen-i? Ne anane nia asipam-ikainen-i? Aa, no muuka amapepe.” 20 Naeya muuka nain amapekapomamik. Ne sawur nain-ke Yeesus urufap muuka nain nan-pariw samor akena ipiskeya miiwa-pa wakiep ini-kiri-kiremi opek fafela onaiya wuam-ikua. 21 Ne Yeesus-ke wiawi wiar nokarek, “Napuma fain iikamin aawok?” Ne wiawi-ke maek, “Iiriw takir gelemuta ikok aawok. 22 Ne anane maneka sawur-ke ifakimekam naep mukuna-pa ipiskiya, ne eka-pa ipiskeya wakiya. Ne no pepek naep-na i yia kemalep yia asipe.” 23 Naeya maakek, “No moram opora naap maen, ‘No pepek naep-na’? No Mua Maneka kekanowa wiar nainan-na maa main nain eliwa nefar arinon.” 24 Ne mua nain-ke kerew maek, “Yo Mua Maneka kekanowa makena-ke wiar naiyem, nain yo kema ere-erup ariyem. No efa kekanoweya yo Mua Maneka opora baliwep opinen.”

25 Ne yakeyak maneka ekapemi suuw-iraparu naep onamik. Ne Yeesus-ke naap wia urufap sawur nain kakankami maakek, “No opaimik marew, ifan momora. Yos-ke nefa maakiyem, no takira fain piipue. No nainiw mia-pa me wiar are.” 26 Sawur nain kakankeya samor akena kiriremi takira nain anu-fieneya putu-patanem-ikaeya piipuap ikiwok. Ikiweya takira nain nan puep ikua, umowa saarik. Ne naap urufap maemik, “O umok.” 27 Ne Yeesus-ke wapena-pa opap iikiroweya iimarek.

28 Naap ikok Yeesus ona teeria wiamiya koora ikiwep wiisow ikok nokaremik, “Moram i sawur fain iirarowa me pepek?” 29 Naeya wia maakek, “Ni niena kekanowa-pa sawur sira naap nain iirarowa me pepek. Mua Maneka farep ona kekanowa-pa iirarowa nain-ke pepek. Era oko-ko me ikua.”

Yeesus ona umep ikok iikirowa nain nainiw maek

(Matiu 17.22-23, Luk 9.43-45)

30 Aria Yeesus ona teeria onaiya owowa nain piipuap ikiwemi Galili kame gone puukap ikiwemik, i epa kaaneke ikemik nain mua papako me yia amisaruk naek. 31 Moram wiisow ikok ona teeria suule wiekam naep. Ne aria feenap wia maakek, “Yo Mua Muuka wi iiwua wapena-pa efa wuiwkin efa ifakimikuan. Ne fofa arow-pa iikirinen.” 32 Naap wia maakek, nain wi kema me aawemik, ne o nokarowa pun keker opamik.

Mua naareke woos mua ikainon nain aakunemik

(Matiu 18.1-5, Luk 9.46-48)

33 Aria wi ikiwemi Kapeneam owowa fuunemik. Fuunep koora ikiwemik. Koora-pa ikok Yeesus ona teeria wia nokarek, “Ni era-pa ekapem-ikok maa mauwa aakuneman?” 34 Wia nokarek-na wi popor maneka ikemik. Moram mua naareke wiena woos mua ikainon, wi nain aakun-ekapem-ikemik.

35 Ne aria Yeesus pokap ona teeria mua ten kuisow erup nain wia fareya ekapiwkin wia maakek, “O mua eena woos mua ikowa kookalep-na iiwawun wame porop taar teekow mua wame arowinok.” 36 Naap wia maakep takir gelemuta oko aawep gone-pa wiar iimarowap opap kemenimep ikok wia maakek, 37 “O mua yo efa kema suuwap takir gelemuta feenap nain saliwinon-na yo efa saliwiya nainen. Ne me yo yaisow, weetak, Auwa efa sesekak nain pun saliwiya nainen.”

Mua eena me yia iiwuariya nain yiena teeria-ke naeka

(Luk 9.49-50)

38 Aria Yon-ke Yeesus maakek, “Somek mua, mua oko no nefa unufami sawur wia iirarem-ikaeya urufamik. Ne mua nain me i teeria-ke. Naapeya o nainiw naap me oninok naep maakemik.” 39 Naeya Yeesus-ke wia maakek, “Weetak, uuwowa nain me wiar puukeka, naap onam-ikainok. O mua yo unuma-pa maa miililina oniya nain opor samora ewur me efa oninon. 40 Mua me yia samoriya nain, yiena teeria-ke naeka. 41 Yo makena nia maakiyem, wi mua ni Krais teeria-ke nia naemi eka dabela nienakimik nain Mua Maneka-ke sira eliwa nain wia kiripominon.” Naap maek.

Sira samora onap kema kirowa nain maek

(Matiu 18.6-9, Luk 17.1-2)

42 Ne nainiw maek, “Takir gelemuta feenap nain yo opora opam-ikaeya mua oko-ke pina onowa ofakoweya oro-booninon. Mua nain iiriw nomon maneka imakuna-pa wiar kaikap ifer gone-pa wafuriwkin umekak-na eliwa.

43 Ne ni wapena-pa pina onap-na wapena nain puukap iirareka. Wapena kuisow ikok kema kirep Mua Maneka opora wiar miimam-ikok umep anane o wameiya-pa eliwa ikowen. Oko wapena erup ikok sira samora oni-ikim-ikok umiwkin Mua Maneka-ke epa samora-pa nia wafureya mia yoow manekiw ikowen.[ 44 Epa samora nain ilua-ke mia niar enem-ikaikuan. Ne mia yoow manekiw ikowen, me weeserinon.]

45 Ne niena meren okaiwi-ke sira samora-pa nia pikiwinok-na puukap iirareka. Merena kuisow ikok kema kirep Mua Maneka opora wiar miimam-ikok umep o wameiya-pa ikowen. Oko merena erup ikok sira samora oni-ikim-ikok umiwkin os-ke epa samora-pa nia wafurinon.[ 46 Epa samora nain ilua-ke mia niar enem-ikaikuan. Ne mia yoow manekiw ikowen.]

47 Ne niena mokok okaiwi-ke sira samora-pa nia pikiwinok-na mokoka nain pusunowap iirareka. Mokok okaiwi muutiw ikok kema kirep Mua Maneka opora wiar miimam-ikok umep o wameiya-pa ikowen. Oko mokoka erup ikok sira samora oni-ikim-ikok umiwkin os-ke epa samora-pa nia wafurinon. 48 Epa nain ilua-ke mia niar enem-ikaikuan. Ne anane maneka mia yoow manekiw ikowen, me weeserinon.”

49 Ne opora oko naap wia maakek, “Maa enowa ifer masia wuimik nain enowa eliw akena. Mua pun sira naap, Mua Maneka naep yoowa aawikuan-na ikoka eliw ikaikuan. 50 Ifer masia maa eliwa-ke. Oram ikok dabelalep masia ikiwinon-na, kamenap oniwkin masia kiiriw imenarinon? Weetak, me pepek. Ifera maa enowa-pa wuamkun maa enowa eliwa ariya. Ne nis pun naap ifera saarik ikok mua oko wiamiya eliwa ikowa sira nain imeneka.”